Europako Ikerketa Kontseiluak (ERC, ingelesezko siglengatik) ERC Consolidator Grant izeneko prestigiodun laguntza bat eman dio Amaia Cipitria doktoreari, Biogipuzkoa Osasun Ikerketako Institutuko Bioingeniaritza Birsorkuntzan eta Minbizian taldeko buruari eta Ikerbasque ikertzaileari. Laguntza horrek 2,3 milioi euroko finantziazioa lortu du, eta DORMATRIX proiektua garatzeko erabiliko dira. Proiektu horren helburu nagusia da bularreko minbiziaren latentzia modelatzea, gertaera emergente kolektibo bezala biomaterialak eta mikrofluido-gailuak erabilita.
Cipitria doktoreari eman zaion diru-laguntza horrek balioko du gailu berriak garatzeko eta metastasi klinikoa baino lehenago bularreko minbiziak duen latentzia-fase ikusezinari buruzko ezagutza berriak sortzeko. Horrek aukera ematen du metastasiak atzeratzeko edo prebenitzeko. Cipitria doktorearen hitzetan “oso hunkituta nago proiektu honekin, eta eskerrak eman nahi dizkiet nire ikerketa-taldeari, taldeko kide izandakoei, Biogipuzkoako lankideei, zientzia-komunitateko lankideei, nire ibilbidean zehar izandako kolaboratzaileei, ikuskatzaileei eta aholkulariei, eta nire familiari; hainbeste pertsonaren laguntzarik gabe hori ezinezkoa zatekeen. Eta, jakina, DORMATRIXek emango digun ikerketarekin ilusio handia du, etorkizunean garatutako teknologia berriek eta sortutako ezagutzek metastasia atzeratzeko edo prebenitzeko terapia berriak garatzeko aukera emango duten ikuspegiarekin”.
Gainera, laguntza honek Cipitria doktorearen ibilbide zientifiko bikaina sendotzen du. Amaia Cipitriak ingeniaritzako prestakuntza du Nafarroako Unibertsitatean – TECNUN, eta Materialen Zientziako eta Metalurgiako doktoretza egin zuen Cambridgeko Unibertsitatean (Erresuma Batua). Ondoren, Queensland-eko Unibertsitate Teknologikoan (Australia), Berlingo Charité Unibertsitate Ospitalean (Alemania) eta Max Planck Institutuan (Alemania) egin zuen lan, eta 2021ean Biogipuzkoara batu zen Ikerbasqueko ikertzaile elkartu gisa. Bere ikerketa-lan handia islatzen da zientzia-aldizkarietako argituratutako artikulu-kopuruan eta estatutako eta nazioarteko hainbat ikerketa-proiekturen buru izatean.
ERCk ematen dituen laguntzek Europako bikaintasun zientifikoa eta abangoardiako ikerketak saritzen dituzte. Adibidez, iaz, 88 proposamenetatik 10 eman zitzaizkien Espainiako Estatuak zientzia fisikoen eta ingeniaritzaren arloan aurkeztutako proiektuei. Izan ere, laguntza horiek ematen hasi zirenetik Espainiako ikerketa biomedikoko erakundeek lortutako Consolidator Grants laguntzak urriak izan dira. Gainera, azken 15 urteetan 11 Consolidator Grants eman dira Euskadin. Datu horiek guztiek Cipitria doktoreak egindako proposamenaren bikaintasuna azpimarratzen dute.
.png)
